LAOAG CITY – Umabot ti nasurok 10.4 a milyon a pisos ti balur amin dagiti nadadael iti biang ti agrikultura ditoy probinsya kalpasan ti iduduprak ti bagyo Oddete.
Daytoy ti inpakaammo ni Provincial Agriculturist Mrs. Norma Lagmay.
Kuna na nga umabot ti 608.5 nga ekatarya ti kalawa ken agbalur ti nasurok 9.9 a milyon a pisos ti nadadael iti ibiang ti mula a pagay kangrunaan iti ili ti Pagudpud, Bangui, Burgos, Bacarra, Paoay ken ditoy siudad ti Laoag.
Inbatad ni Lagmay nga iti biang ti nateng kas iti mula a pakwan ken lasona, ket umabot ti nasurok 368 a ribo a pisos ti nadadael idinto nga umabot ti nasurok 147 a ribo a pisos ti nadadael binag ti piskarya kangrunaan iti siudad tin Batac ken iti ili a Badoc.
Mainaig iti daytoy, nakaibunong dan kadagiti dadduma nga imula dagiti mannalon a naperdian ti pagay tapno makaabrut da.
Kuna ni Lagmay a nakaipaay dan ti 40 a tonelada ti balatong, laya, maimula a lasona, bawang ken sabsabali pay.
Innayon na nga agal-ala dan kadagiti masterlist dagiti makipaset ti credit assistance program para ti high-breed rice.
