LAOAG CITY – Naglikudan ti kampo ni Bamban, Tarlac Mayor Alice Guo ti pakainagan ti Mayor iti Chinese passport holder a ni Guo Hua Ping a basar ken ni Senator Sherwin Gatchalian ket posible a ni Mayor Guo met laeng.
Segun iti abugado ni Mayor Guo a ni Atty. Stephen David, adu dagiti tattao nga addaan ti nagan a Guo Hua Ping isu a ginutigotna ti Senador nga ipresentar iti proper forum no addaan daytoy ti nadagsen nga ebidensia a maymaysa laeng a tao ti Chinese a ni Guo Hua Ping ken Mayor Guo.
Inbatadna a narigat a sungbatan ti nasao nga isyu nga inawaganna a publicity.
Maipalagip nga inrepresentar ni Sen. Gatchalian idi Martes dagiti rekord manipod iti Board of Investments ti aplikasion ti pamilia Guo para iti Special Investors Resident Visa (SIRV).
Rumrummuara kadagiti dokumento a simmangpet ditoy pagilian ni Guo Hua Ping idi Enero 12, 2003 iti tawenna a 13 pay laeng.
Nakaikabil ti pudno a petsa ti pannakaiyanak daytoy ket idi Agosto 31 idi tawen 1990.
Inbutaktak met ni Sen. Gatchalian a ti nakarehistro nga ina ni Guo Hua Ping para iti nasao nga Special Investors Resident Visa ket ni Lin Wenyi nga immunan a napagatapan nga isu ti pudno nga ina ni Mayor Guo.
Iti biang ti Mayor, immunanan a naglikudan ti alegasion a ti Chinese national a ni Lin Wenyo ti ina dayoty ken inpettengna a ni Amelia Leal ti biological mother-na.
