LAOAG CITY – Posible a makasoan ti perjury ni Bamban, Tarlac Mayor Alice Guo no mapaneknekan o saan daytoy a Filipino citizen segun ken ni Commission on Elections Chairman George Garcia.
Inlawlawagna a nagsapata iti mismo a Certificate of Candidacy ni Mayor Guo.
Nupay kasta, kuna ni Garcia nga awan ti limmapped wenno nangipila ti disqualification case idi kandidato pay laeng ni Guo kasta pay idi nagparehistro daytoy idi Abril 2021 isu nga inaprobaran ti Election Registration Board.
Segun iti Poll Body Chief nga iti babaen ti linteg, dagiti laeng umili a Pilipino ti mabalin nga agpaidasig para iti public office.
Inbatadna a saan nga imanmandar ti Commission on Elections ti maysa a kandidato ti dadduma pay a requirements tapno paneknekan ti tawen wenno nasionalidad malaksid laeng iti panagsapata iti panangipilada ti kandidaturada.
Inpalgakna a saan met a mabalin nga agkedked ti Commission on Elections ti Certificate of Candidacy ti maysa a kandidato nga awan ti disqualification wenno cancelation case nga inpila ti maysaa a rehistrado a botante.
Immuna iti daytoy, namunganay ti kaso ni Mayor Guo kalpasan a nairaman ti naganna iti Philippine Offshore Gaming Operator nga inwayat dagiti otoridad iti umuna a paset ti Marso kadagiti kaso a maipagarup nga adda ti pakainaiganna iti human trafficking ken serious illegal detention banag nga immunan a naglikudan ti nasao a Mayor.
