LAOAG CITY – Pormalen a nalukatan ti Bamboo products display center iti Brgy. 40 Balatong ditoy ciudad ti Laoag.
Indauloan ni Mayor Micheal Marcos Keon ti nasao programa pakairamanan dagiti department heads ken sumagmamano a konsehal.
Segun ken ni Mayor Keon napili ti Brgy. 40 Balatong kas lugar a pakaestablisaran ti naso a center gapu ta adda ti grupo a residente iti nadakamat a barangay nga agararamid kadagiti nagduduma a produkto manipud iti kawayan ken gapu iti kinaado ti kawayan iti lugar.
Innayonna a maysa a tawenen sipud idi napagsasaritaanda ti pannakaipaay ti suporta kadagiti bamboo weavers agingga adda ti nakaibaga kadakuada nga adda ti grupo iti nasao a barangay.
Gapu ti suporta ti Sangguniang Panlungsod ket nagballigi ti nasao a proyekto ken kalikagomda maipatakderan ti dadduma pay a barangay ditoy ciudad.
Mainaig iti daytiy, dinayaw ni Vice Mayor Carlos Fariñas ti nasao a proyekto.
Kinunana nga idi napalabas a bulan ket naisayangkat ti committee hearing ti waterlily weavers ket nakitana a napintas a proyekto ti nadakamat a display center a kas iti nasao a barangay.
Innayonna a nagasat dagiti residente iti nasao a lugar sipod ta adda ti kapitanda a mangtultulong kadakuada.
Nagyaman met ni Brgy. Chairman Joseph Bitagon iti lokal a gobierno ken dagiti ahensia timmulong kadakuada tapnu maipasdek ti nasao a center.
Segun ken ni Kapitan Bitagon ubing pay laeng isuna ket adda dagiti agargaramid ti nasao a produkto no sadinno iti agdama ket adda ti 32 a miembro ti bamboo weavers.
Kabayatanna kinablaawan ni Sangguniang Panlungsod Member Bryan Alcid dagiti amin a miembro ti bamboo weavers ken dinayaw ni Sangguniang Panlungsod Memver Kiko Ang ti initiatibo dagiti bumarangay gapu ta maipakita ti nagduduma a produkto manipod ti kawayan.
