LAOAG CITY – Agkurkurangen ti suplay dagiti sumagmamano a sawsawan manipud ditoy Pilipinas kas ti ketchup, sarsa ken baggoong kadagiti sumagmamano a paglakoan idiay New York.
Daytoy ket kageddan ti panangiparuk-at ti United States Food and Drug Administration (FDA) ti Import Alert Number 99-45 idi Oktobre 25 a mangipawil iti panagserrek dagiti multiple all-purpose sauces ken shrimp pastes manipud ditoy pagilian.
Malaksid iti Pilipinas, naapektaran pay ti import alert ti agarup 30 a pagilian iti intero a lubong.
Naammoan a dagiti kompania nga adda iti red list ket “subject to detention without Physical Examination,” a kayatna a saoen ket aniaman a wagas iti panangiserrek dagiti nasao a produkto idiay Estados Unidos ket makumpiskar.
