LAOAG CITY – Nagballaag ti Toxic watchdog BAN Toxics mainaig iti pito a China-made skin whitening creams a mailaklako iti online shopping sites kalpasan a nakitaan ti mercury content.
Naamoan nga uppat kadagiti nasao a produkto ket ipawilen ti Food and Drug Administration (FDA).
Inpakaammo ti grupo nga usar ti Vanta C Series Handheld XRF Chemical Analyzer, dagiti skin lightening cream, nga agbalor ti P80 agingga iti P264 ket naduktalan nga addaan ti ado a mercury, nga addaan ti lebel manipod 115 agingga iti 5,150 parts per million (ppm), nalablabes ngem ti limitasyon ti regulasyon.
Basar iti World Health Organization Fact Sheet on mercury and Health, ti mercury ket maibilang kas maysa a top ten chemicals ti major public health concern.
Ti pannaka-expose uray bassit laeng a mercury ket mabalin a mangitunda ti problema iti salun-at ken pangta iti panagdur-as ti maysa nga ubing iti utero ken kadagiti umuna a paset ti biagda.
Mabalin pay a ti mercury ket maaddaan ti makasabidong nga epekto iti nervous, digestive, ken immune system, pakairamanan ti bara, bato, kudil ken mata.
