LAOAG CITY – Nalukatan ti Banana Processing Center a masarakan iti Brgy. Alay iti ili Badoc babaen iti Department of Agrarian Reform ken ti local a gobierno iti nasao nga ili.
Daytoy ket kageddan ti pannakaipaima na iti Sirmata Multipurpose Cooperative.
Naamoan a ti nasao a pasdek ket pinondian ti DAR iti 300,000 a pisos, 120,000 a pisos ti susposop iti local a gobierno ken 26,000 ti naggapo iti kooperatiba.
Immuna iti daytoy, inlawlawag ni DAR Sec. Bernie Cruz a ti trabaho ti ahensya ket saan laeng nga agipaima ti titulo ti daga ngem ketdi agbalin a produktibo iti pannakaidiaya kadagiti support services.
Karaman ditoy ti capital para iti pannakapadur-as ti pagngedan dagiti mannalon.
Kabaytaanna, inpakaammo ni Bise Gobernador Cecilia Araneta Marcos a nakasagana ti gobierno probinsyal a makibinnadang para iti pannakapadur-as ti banana chips production iti ili ti Badoc.
