LAOAG CITY – Naipawil kadagiti Pilipino idiay Hongkong nga iwagayway ti bandera ti Pilipinas ita nga aldaw gapo ta delikado para kadakuada gapo iti nalawa a tignay protesta.
Daytoy ti inbatad iti Bombo Radyo Laoag ni Mrs. Tessie Fuerte, tubo iti Barangay 48-A, Cabungaan North ditoy ciudad ti Laoag ken agtrabtrabaho idiay Hongkong.
Segun kenni Fuerte, awan ti naibaga kadakuada a rason no apay a naipawil ti pannakaiwagayway ti bandera ti Pilipinas ngem naiget ti panangbalakad ti pulisya kadagiti Pilipino a doblean da ti agannad ita nga aldaw, National Day iti nasao a pagilyan.
Malaksid iti pannakaipawil nga agipakita ti bandera ti Pilipinas ket nabalakadan da pay a saan a rumwar ken saan nga agisuot ti puraw ken nangisit a bado.
Inbatad na nga iti kada Pilipino iti nadakamat a lugar ket naikkan ti surat mainaig iti daytoy.
Naamoan a mangrugi ti tignay-protesta iti Tin Hau ken lumabas iti Causeway Bay, Wan Chai, Admiralty agingga iti eropuerto, a kangrunaan a pagpaspasyaran dagiti tattao.
Kunana pay a maipalpalapayag kadakuada a Pilipino a narungsot dagiti rallyista pakairamanan dagiti pulis a manglapped iti dakkel nga aktibidad.
Mainaig iti daytoy, kuna ni Fuerte nga uray dagiti amo dagiti OFWs ket pinakdaaran da dagiti Pilipino a saan a rumwar gapo ta no adda man ti mapasamak a madi kadakuada ket awan ti sungsungbatanda.
Maipalagip a namunganay ti riribok iti nasao a pagilyan gapo iti kontobersyal nga extradition bill ken kalikagom dagiti tattao a bumaba iti pwesto ni Hongkong leader Carrie Lam.
