LAOAG CITY – Kinumpirmaran ni Police Lt. Medel Peririon, chief of police ti PNP-Currimao a naalan ti agtagikua iti bangka a nakita iti tengnga ti taaw iti paset ti Brgy. Victoria iti nasao nga ili.
Segun kenni Peririon, itay bigat ket nagturong iti ili ti Currimao ken naala ti bangka babaen iti dokumento nga inpakita met ti akinkukua a ni Ruben Serna a residente iti Barangay Puro, Caoayan, Ilocos Sur.
Kunana a naglugan met laeng ti bangka da Serna ken dagiti dua a kakadwa na a nagturong iti ili ti Currimao.
Ummuna iti daytoy, kuna ni Peririon ni Serna ken dagiti kakadwa na ket napan da nagkalap ken ti maysa kadagitoy ket nakaala ti dakkel a lames rason a nagpatulong.
Gapo iti daytoy, pinanawan ni Serna ti bangka na ken napan na tinulungan ti kadwa na ngem kalpasan daytoy ket saan dan a mabirukan ti bangka na.
Dagus met a naireport wenno in-flash alarm iti pulisya iti Ilocos Sur ken dimmanon met kadakuada ti impormasyon nga adda ti mapukpukaw a bangka.
