LAOAG CITY – Nabigbigen ti kinasiasinno ti bangkay ti lalaki a nabirokan iti waig iti Brgy. 57 Pila, ditoy siudad ti Laoag itay kallabes.
Binigbig ni Police Lt. Col. Amador Quiocho, hepe ti PNP Laoag ti biktima a ni Marion De Leon y Dolores, agtawen ti 50 ken residente iti Brgy 9, iti ili ti San Nicolas.
Basar ti palawag ti pamilya ti biktima, inbunannag ni Quiocho a pimmanaw ti biktima idi Enero 3, 2020 ken saanen a nagawid iti pagtaengan da.
Segun kenni Quiocho, saan da pay nga ammo no kasanu iti pannakatay ti biktima ken no kasanu a nakadanun ditoy siudad ti Laoag.
Kuna a nabigbig ti nasao a biktima babaen ti maysa a kameng ti PNP a karruba na.
Nupay kasta, saan da pay a nakasarita ti pamilya ti nasao a biktima.
Immunan a nakasarita ti Bombo Radyo ni Mrs. Edilyn Pitpit, OFW idiay Kuwait a taga ili ti Banna agraman ti pamilya Pitpit a mangnamnama a mabirokan na ti mapukpukaw nga asawa na kalpasan a nakumpirmaran nga saan nga isu iti nabirokan a bangkay iti nasao a barangay itay kallabes.
