LAOAG CITY – Naiyawiden diay India ti bangkay dagiti 45 nga Indian nationals workers a natay iti nauram iti residential building idiay Mangaf City, Kuwait idi Hunyo 12, 2024.
Immuna nga inrakurak dagiti otoridad ti Kuwait a 50 a tattao ti natay iti uram, pakairamanan ti 45 manipud India, 3 manipud Pilipinas bayat a 2 pay ti saan a nabigbig.
Segun ken ni Indian Minister Kirti Vardhan Singh a personal a napan idiay Kuwait isuna kalpasan ti insidente, naisayangkat metten ti DNA test tapno maammuan ti kinasiasino dagiti biktima.
Karaman kadagiti Indian national workers a nakumpirmaan a natay ket 23 manipud iti estado ti Kerala, 7 manipud Tamil Nadu, 3 ti tunggal maysa manipud Andhra Pradesh ken Uttar Pradesh, 2 manipud Odisha ken 1 ti tunggal maysa manipud Bihar, Punjab, Karnataka, Maharashtras, West Bengal, Jharkhand ken Haryana.
Segun iti Indian Minister, inyurnos ti Indian Government ti special Air Force flight tapno maiyawid dagiti bangkay dagiti pimmusay.
Maipalagip a malaksid kadagiti pimmusay ket naruay met dagiti nakapasar ti nakana a sugat.
Kabayatanna, inwaragawag ti state ken federal governments a mangipaay da ti kompensasion kadagiti natayan a pamilia.
