LAOAG CITY – Naruay a tattao dagiti napan nangkita ti bangkay ni Archbishop Emeritus Edmundo Abaya a naimansayag iti mismo nga uneg ti St. Williams Cathedral ditoy ciudad ti Laoag.
Naikabil ti bangkay ti arsobispo ditoy ciudad ti Laoag idi malem ket maisubli met laeng idiay Vigan City intono bigat, aldaw ti Miyerkules, oras ti alas-diyes ti bigat kalpasan ti misa iti alas-otso.
Maipalagip a natay ni Archbishop Abaya iti tawen na nga 89 gapu ti sakit na a pneumonia bayat a maag-agasan iti Cardinal Santos Memorial Hospital idiay San Juan, Metro Manila.
Mainaig ti daytoy, nagyaman ti maysa kadagiti apoko ni Archbishop Abaya a ni Miss Shey Pia Abaya kadagiti amin a tumultulong, makian-andingay ken mangsupsuporta iti pamilya da iti ipapatay ti lolo na.
Segun pay iti ub-ubing nga Abaya, nagasat da gapu ta naaddaan da ti lolo a kas ken ni Archbishop Abaya a natulong ken inpakita na ti panangipateg na kadagiti umili.
Innayon na a ti saan nanto pulos a malipatan ken ni Archbishop Abaya ket ti panagayat na kadagiti tattao ken papadi.
