LAOAG CITY – Bumisita ti bangkay ni Archbishop Emeritus Edmundo Abaya ditoy Ilocos Norte ita nga aldaw.
Segun ken ni Father Joey Ranjo, pannakangiwat ti Diocese of Laoag, itay pay alas 4 ita a malem a simmangpet ti bangkay ti dati nga arsobispo ken naideretso iti St. William Cathedral nga isu ti pakaimansayag.
Kuna ti padi a bayat a maimansayag ti bangkay ti dati nga arsobispo ket adda da dagiti misa wenno panagkararag a maisayangkat.
Kuna na pay a nakalukat a makita daytoy ti publiko.
Maipalagip a nagserbi nga Obispo ti Diocese of Laoag ni Abaya idi 1979 agingga iti 1999.
Pimmusay daytoy itay lawas na gapu iti sakit a pneumonia iti tawen na nga 89 bayat a maag-agasan idiay Cardinal Santos Memorial Hospital San Juan, Metro Manila.
Naituding nga agsubli ti bangkay ni Abaya idiay Vigan inton oras ti alas 10 ti bigat.