LAOAG CITY – Inbaga ni Barangay Chairman Nowell Villa iti Brgy. 7 iti ili ti San Nicolas a saanda nga ammo no kasanu ken sadinno ti nakaalaan ti kabarangayan da ti pimmusay a ni IN-C2765, agtawen ti 74 a babai ti covid-19 virus.
Daytoy ket gapu ta saan unay a rumrumuar ken agsursursur ti pasyente iti barangay da.
Inbatad ni Villa a naipan a dagus ti bangkay ni IN-C2765 idiay ciudad ti Vigan para iti pannakai-cremate na ken manamnama a maiyawid ita nga aldaw iti ili ti San Nicolas.
Inlawlawag ni Villa a basar iti pamilya ti pasyente ket awan ti sagsagbaen na a sakit ken idi mapan alaen ti ambulansya ket aguyek laeng ken marigatan nga umanges.
Innayon na a kalpasan ti dua nga aldaw ket naipakaammo kenkuana idi rabii a pimmusayen ni IN-C 2765.
Inpakaammo ni Kapitan Villa a naka-isolate iti agdama dagiti napan nagbantay iti nasao a pasyente.
Kabayatanna, kuna ti kapitan a ti laeng naka-lockdown iti agdama ket ti balay ti pimmusay a pasyente gapu ta adda ti bukod da a gate.
Naamoan a tallo laeng ti kabbalay ti pimmusay a pasyente.
Mainaig iti daytoy, immapela manen ti opisyal ti barangay kadagiti kabarangay na a masapol a sumurot iti health protocols tapno malapdan ti panagwaras ti makapatay a virus.
