LAOAG CITY – Adda ti 12 a tattao a natay iti uneg ti maysa a restaurant iti nalatak nga ski resort iti Caucasus Mountains iti Georgia.
Basar iti Police Department ti Ministry of Internal Affairs iti Georgia, narekobre dagiti bangkay iti Gudauri, ti nalatak ken mabigbig nga ski resort nga asideg ti Russian border.
Nakumpirmaran a dagiti biktima ket agpapada nga agpapaay iti pasilidad.
Iti pannakaeksamen dagiti bangkay ket awan ti pagilasinan a dagiti biktima ket nagpasar ti kinadamsak gapu ta awan pulos ti nakita sugat iti bagi da.
Nupay kasta, iti inisyal nga imbestigasyon dagiti otoridad ket naduktalan da a ti power generator ket naikabil iti maysa a nakaserra nga espasyo asideg iti sumagmamano a pagturugan dagiti agpapaay iti pasilidad.
Gapu iti daytoy,patien dagiti otoridad a ti pannakatay dagiti biktima ket gapu iti negligent manslaughter.
