LAOAG CITY – Inrakurak ti National Bureau of Investigation (NBI) a nabirukanen dagiti dua pay a Pilipino a natay iti idadayyeg ti magnitude 7.7 a gingined idiay Myanmar idi Marso 28 ita a tawen.
Inbatad ni National Bureau of Investigation Director Jaime Santiago a nabigbig dagiti dua pay a biktima babaen iti naiwayat a DNA test.
Immunan nga inrakurak dagiti otoridad a naalaan ti DNA samples dagiti bangkay ti dua a mapapati a Pinoy couple a naireport a mapukpukaw kalpasan ti idadayyeg ti napigsa a gingined.
Ti nasao a DNA samples ket naikompara iti DNA dagiti kapamilya da.
Maipalagip nga immuna a nabirukan ken nabigbig ti dua a Pilipino a karaman a natay iti narpuug a condominium building a pagnanaedan da idiay Mandalay.
Nasurok a 3,000 a tattao ti natay iti napasamak a gingined a nakaapektar pay iti kaparanget na a pagilian a Thailand.
