LAOAG CITY – Awan ti foul play ti pannakatay ti maysa a baket a nabirukan laengen nga agtatapaw ti bangkay na ti karayan ti paset ti Barangay Agitap, Solsona, Ilocos Norte.
Nabigbig daytoy a ni Teodora Salvador, agtawen ti 83, balo ken residente ti nasao a barangay.
Segun ti report, bayat ti panagturong ni Jomar Salvador, agtawen ti 21 ti karayan tapno mapan agkalap ket nakita na laengen ti agtatapaw a bangkay ni Salvador.
Ti pannaka-eksamen ti bangkay ket pinasingkedan dagiti maseknan a pakairamanan ti pamilya ti biktima nga awan ti foul play ti pannakatay ti baket.
Mamati ti pamilya ni Salvador a possible a naigalis daytoy a nangitunda ti pannakalmes ken pannakatay na.
Naamoan a ni Salvador ket agkabawen ken adda dagiti gundaway a mapan ti kabanbantayan tapno mapan mangayo ken mapan agala ti bisukol ti karayan.
