LAOAG CITY – Nabirukan ti bangkay ti maysa a babai iti Sitio Sumiling, Brgy. 23, San Andres, iti Sarrat, Ilocos Norte.
Nabigbig ti biktima a ni Josie Paelmoca, agtawen ti 54, naasawaan ken residente met laeng iti nadakamat a barangay.
Basar iti imbestigasyon, napan ni Herman Bumanglag, agtawen 62, naasawaan ken residente met laeng iti barangay iti balay ti biktima idi naipasabat kenkuana ti nabangsit nga angot manipod iti uneg ti pagtaengan ni Paelmoca.
Gapu iti daytoy, simmirip ni Bumanglag iti tawa ti balay ni Paelmoca ket ditoy a nakita na a ti nalamiisen a bangkay ti a nakaidda iti kama na.
Segun ken ni Jenifer Paelmoca, anak ti biktima, agtawen ti 32, awanan asawa ken residente ti Brgy. 54-A Lagui Sail ditoy Siudad ti Laoag, agmaymaysa ti inana nga agnanaed ti balayna ken adda ti sakit na nga Hypertension ken Diabetes.
Inbatadna nga iti panangeksamen ni Dr. Jennifer Bueno Valdez, Municipal Health Officer iti ili a Sarrat, iti bangkay ti ina na ket naamoan nga addan tallo agingga iti lima nga aldawen a pimmusay ti biktima gapu iti Cardiac Arrest.
