LAOAG CITY – Maysan a bangkay idi nakita ti maysa a baro a tumtumpaw iti sabangan a paset ti Barangay Burayoc iti ili ti Pagudpud.
Segun kenni Police Major Jomar Andres, ti chief of police ti Philippine National Police iti ili ti Pagudpud, ti biktima ket agtawen ti 20, maysa nga estudyante ken residente iti nasao a barangay.
Ummuna iti daytoy, kunana a timmawag kadakuada ni Kagawad William gapo iti pannakakita na ti agtatapaw a bangkay ti biktima isut gapo na a dagus da a nagresponde ken ditoy a nakita da ti baro.
Kunana a basar iti guardian ti biktima, nagpakada daytoy idi Oktubre 5 a mapan maki-birthday ngem saanen a nakasangpet isut gapo na a nagbirok da iti kabigatan ti Oktubre 6 ngem ti laeng nakita da ket ti motorsiklo ti baro nga adda iti hanging bridge.
Inlawlawag na a basar iti imbestigasyon da ket naggi-inom ti biktima ken nalpas da iti parbangon ken mabalin nga idi agawiden ket saan na a nabalanse ti bagi na nga isu ti makitkita a rason no apay a nalmes.
Innayon na nga awan met ti nakita a foul play iti nasao nga insidente ken basar iti panangeksamin ti doktor ket ti pannakalmes ket isu ti rason ti nakatayan ti biktima.
