LAOAG CITY – Binigbigen ti pamilya ti bangkay a nasarakan iti maysa nga irrigation canal iti Barangay Buyon iti ili ti Bacarra.
Daytoy ket nabigbig a ni Arjay Magabelin, agtawen ti 35, awanan asawa, ken residente iti Barangay 4 Santa Maria iti ili ti Vintar.
Narekobre pay iti irrigation canal ti nagluganan ti biktima a Rusi 110 nga agmaris ti nangisit.
Segun kenni P/Lt.Col. Roldan Suitos, mapukpukaw ti biktima sipud pay idi Nobiembre 21.
Kinunana a basar iti report ti Philippine National Police iti ili ti Vintar, Nobiemre 16 idi nagpakada ti biktima iti kabsatna a mapan daytoy idiay Claveria, Cagayan, ngem apaman a sinalidsodda no nakadanunen ket dita a naammuan a saan pay, rason nga inreport da nga insigida iti biang ti PNP Vintar.
Patien ni P/Lt.Col. Suitos a posible a nabayagen a natay ti biktima gapu ta adda angot nan a saan a makaay-ayo.
Malaksid iti daytoy ket naamuan pay nga adda impluwensiya ti biktima a nasanger apaman a napasamak ti insidente.
Awan met ti nakita a foul play ti pannakatay ti biktima.
Maipalagip, a nagkamang ti maysa nga individual iti Philippine National Police iti ili ti Bacarra apaman a naka-angot ti nabangsit idi lumabas iti irigasyon, rason nga insigida met a napan kinita dagiti otoridad ket dita a nakita da ti agtatapaw a bangkay.
