LAOAG CITY – Nakita ti bangkay ti lalaki iti nasulimek a paset ti Barangay Tabucbuc iti ili ti Marcos.
Binigbig ni Police Capt. Jonvale Maramag, ti chief of police iti ili ti Marcos ti biktima a ni George Jesus Domingo, agtawen ti 51, tricycle driver ken agnanaed iti Barangay 1 iti ili ti San Nicolas.
Inbaga na a basar iti inisyal nga imbestigasyon da ket adda ti sugat iti babaen ti barukong ti biktima ken maipagarop a shotgun ti nausar iti krimen.
Kuna na a nakita ti maysa a mannalon a mapan koma agburas ti mais iti lugar ti nakadasay a lalaki ken dagus na nga inreport iti kwerpo ti pulisya.
Inpakaammo na nga iti panagsukisok da ket awan ti nakita da a pagilasinan nga iti lugar ti nakapapatayan ti biktima kas koma ti nagwaras a dara isut gapuna a patien da a possible a naibelleng laeng daytoy.
Iti agdama, agtultuloy ti imbestigasyon dagiti otoridad mainaig iti napasamak.
Kabayatanna, nagpanawagan ni Maramag a no adda ti makakitkita ti tricycle ti biktima nga addaan ti plate number a 6791AW ken body No. SN 1510 a makikoordinar da laeng iti PNP-Marcos gapu ta agpapan ita ket mapukpukaw pay laeng ti nasao a tricycle.
