LAOAG CITY – Nabirukan ti maysa a bangkay ti lalaki nga agtatapaw iti Bislak River iti Brgy. 15, San Roque I iti ili ti Bacarra.
Segun ken ni P/Lt.Col. Roldan Suitos, Hepe ti Bacarra Municipal Police Station, maibasar iti inwayatda nga imbestigasion ket kabayatan ti kaadda ni Orlando Daniega, agtawen iti 57, naasawaan, mangngalap ken residente ti Brgy 16, San Roque I iti ili ti Bacarra iti lugar tapno isagana ti fishing traps ket nakitana ti saan pay a nabigbig a biktima nga awananen ti biag nga agtatapaw iti karayan.
Inbatadna a basar iti Rural Health Unit iti ili ti Pasuquin, naideklara a natay ti nabirukan a lalaki ngem saan pay a masinunuo ti rason ti pannakatayna gapu ta addan ti tallo nga aldaw nga agruprupsa ti bangkay ken awan ti makita a foul play a napasamak iti insidente.
Inlawlawagna a ti biktima ket nailadawan nga agtayag iti 5’4, adda iti kalalainganna a pammagbagi, nakasuot ti nangisit a short ken addaan ti tattaoo iti nagduduma a paset ti bagina.
Kunana nga iti agdama ket adda pay laeng iti puneraria ti nasao a bangkay.
Innayonna a no awan ti mangala iti nasao a bangkay ket nakadepende ti agbalin a desision ti Local Government Unit iti ili ti Bacarra.
