LAOAG CITY – Narekobre ti bangkay ti maikalima a biktima iti pannakarpuug ti Baltimore Francis Scott Key Bridge idiay Maryland.
Binigbig dagiti otoridad ti maikalima a biktima a ni Miguel Angel Luna Gonzalez, agtawen ti 49, residente iti Glen Burnie, Maryland.
Inlawlawag ti Unified Command salvage teams a nabirukan da ti maysa kadagiti construction vehicles nga immunan a naireport a mapukpukaw kalpasan ti pannakarpuug ti rangtay idi Marso ita a tawen ken inpakaammo da a dagus daytoy iti Maryland Department of State Police.
Iti panagsukisok dagiti Maryland Transportation Authority Police ken Federal Bureau of Investigation iti uneg ti truck ket ditoy a narekobre da ti bagi ni Gonzales.
Immunan a nabirukan ti bangkay dagiti uppat a biktima nga isuda Alejandro Hernandez Fuentes, agtawen ti 35, Dorlian Ronial Castillo Cabrera, agtawen ti 26, ken ni Maynor Yasir Suazo-Sandoval, agtawen ti 38.
Kabayatanna, ti maikapat a biktima ket saanen nga inpublikar dagiti otoridad ti kinatao na gapu ta isu ti kiddaw ti pamilya na.
