LAOAG CITY – Nabirukan ti bangkay ti maysa a kameng ti LGBT community iti tengnga ti kataltalonan iti Brgy. 8 Margaay iti ili ti Vintar.
Segun ken ni Police Captain Roi Manuel Ordonio, Hepe ti Philippine National Police iti nasao nga ili, basar iti naisayangkat nga imbestigasion, agarup ala una y media ti malem di kalman ket manarimaan ti panagabono ni Edmond Coloma y Balutay iti mulana a pagay idinto nga apaman a magna daytoy iti pagbatbatayan a kawayan iti National Irrigation Authority canal ket ditoyna a naripar nga adda ti arig agtatapaw iti laud a paset ti nagdalyasatanna.
Gapu iti daytoy, inbatadna a napan immasideg iti lugar ti maseknan a nakakita agingga a naduktalanna a maysa daytoy a bangkay.
Kunana a dagus nga inpakaammo ti maseknan ti pasamak kadagiti barangay officials nangruna ken ni Konsehal Jennifer Lomboy ti Brgy. Margaay nga insigida met dagitoy a nagturong iti nakapasamakan ti insidente ken indanonda daytoy iti kuerpo ti pulisia.
Inlawlawagna a basar iti imbestigasion ken panageksamin ti Ilocos Norte Provincial Forensic Unit ti bangkay ti biktima ket awan ti nakita nga aniaman a senyales ken indikasion ti foul play.
Inpalgakna nga indeklara ni Dra. Heidi Marita Albano, Municipal Health Officer iti ili ti Vintar nga awanen ti biag ti biktima idi nabirukan daytoy iti kataltalonan.
Innayonna a binigbig mismo dagiti kabagian ti biktima ti bangkay a ni Natividad Ramones y Agpoldo a mas am-ammo iti nagan a “NATY,” agtawen ti 69 ken residente ti Brgy. 56-A Bacsil North ditoy siudad ti Laoag.
Kabayatanna, agtultuloy pay laeng ti maisaysayangkat nga imbestigasion pakaseknan iti nasao a napasamak.
