LAOAG CITY – Awan ti nakita dagiti otoridad a foul play iti pannakatay ti maysa a lakay iti Barangay Francisco iti ili ti Dingras.
Binigbig ni Police Major Julius Basallo, chief of police ti PNP-Dingras ti biktima a ni Pedro Gumayagay, agtawen ti 80, awanan ti asawa ken residente iti nasao a lugar.
Segun kenni Basallo, idi malem kalman ket nakita ti agnagan ti Alejandro Aguiran a nakapakleb ti biktima iti paglubnakan ti nuang.
Gapo iti daytoy ket dagus na nga inreport iti barangay ken intawag da iti istasyon ti pulisya.
Inlawlawag na nga iti panagimbestigar da, posible a naulaw ti biktima agingga a naawanan ti puot ken naipakleb iti paglubnakan ti nuang.
Kunana a basar met iti panageksamin ti doktor, ti biktima ket nalmes a rason ti pannakatay na.
