LAOAG CITY – Nabirukan ti maysa a bangkay ti maysa a lalaki iti maysa a waig iti Brgy. Suyo iti ili ti Dingras idi Disiembre 7, 2024, agarup alas 11:30 ti bigat.
Basar ti otoridad, ti biktima ket agnagan ti Gerald Pacleb y Agnes, agtawen ti 48, awanan asawa, mangngalap, ken residente iti Brgy. 19 Santo Tomas iti ili ti Sarrat ditoy probinsia.
Segun ken ni P/Cpt Roy Ordonio, hepe ti Philippine National Police iti ili ti Dingras a basar iti kabsat ti biktima nga agnagan ti Melba Hipolito y Pacleb, agtawen ti 43, naasawaan, waitress, ken residente iti Brgy. Barcelona iti ili ti Solsona, immunan a na-confine ti kabsatna iti Dingras District Hospital idi agsapa ti Disiembre 3, 2024, gapu iti sakit ti tian.
Mainaig iti dytoy, idi alas dos ti bigat ti Disiembre 5, naduktalanna a mapukpukaw daytoy iti uneg ti hospital ward.
Gapu iti daytoy, ket dagos a binirok dagiti pamilia ti biktima sakbay a nasarakanda ti bangkayna iti waig.
Nangipresenta pay ti pamilya ti biktima iti surat manipud iti ospital a mangidawat a masarakan ni Gerald kalpasan a nakalibas daytoy iti nadakamat a pasilidad.
Basar iti kanayonan nga imbestigasion, rimmuar nga agarup alas 12:30 ti tengnga ti aldaw ti Disiembre 5, nakita ni Erickon Rutab y Calaoagan, agtawen ti 43, residente iti nasao met laeng a barangay ti biktima bayat nga agkalkalap iti karayan.
Kabayatanna, naisubli ti bangkay iti Dingras District Hospital, nga indeklara ni Dr. Roland B. Andres a ti rason iti ipapatay ti biktima ket gapu iti Asphyxia secondary iti drowning.
