LAOAG CITY – Maysa a bangkay ti lalaki ti naduktalan a tumtumpaw iti karayan iti ili ti Pasuquin.
Binigbig ni PSSgt. Aldrich Simon, imbestigador ti PNP-Pasuquin ti biktima a ni Roger Ramos, residente iti Brgy. Poblacion 4 iti nasao nga ili.
Inbatad na a basar iti panagimbestigar da iti insidente, kanayun nga uminom ti nasanger ti biktima.
Kuna na nga iti palawag ti pamilya daytoy, agturong ti biktima iti sirok ti rangtay nu adda iti impluwensya ti nasanger rason a patienda a natennag bayat nga agpapa-usaw.
Mainaig iti daytoy, inbatad na a basar iti eksaminasyon ti RHU, mapatta-patta a parbangon pay laeng idi nalmes ti biktima gapu ta bimsog ken addan ti pannakalapgis ti kudil na.
Immuna iti daytoy, inpakaammo ni Simon nga apaman a naalaw ti biktima manipod ti karayan ket adda ti nakita a sugat gapu iti posible a pannakaitupar na.
Nu pay kasta, inbatad ni Simon nga awan met ti makiita a foul play iti nasao nga insidente.
