LAOAG CITY – Narekobre ti bangkay ti maysa a lalaki iti uneg a mismo ti balayna iti Sitio Camangaan, Barangay Poblacion iti ili ti Nueva Era.
Ti biktima ket addaan ti umno a tawen, naasawaan, dati a Barangay Tanod, ken residente iti nadakamat a barangay.
Basar iti imbestigasyon, mismo a ti kaanakan ti biktima ti napan nagreport iti Philippine National Police kalpasan a narekobre na a ti ulitegna a maysan a nalamiis a bangkay.
Iti pannakaiwayat ti naun-uneg nga imbestigasyon, basar iti anak a babai ti biktima nga agdama nga agnanaed iti Project 8, Manila, dua nga aldaw a tinawtawagan na ti ama na ngem saan a sumungsungbat isut gapuna a kinasarita na ti kasinsin na a mapan na kitaen iti balayna.
Naamoan a ti biktima ket dua nga aldaw a saan a nakitkita dagiti karruba na a rimuar iti balay na no sadinno a ti naudi ket idi napan gimmatang ti soda iti tianggi ken nadakamat na ti panagsaksakit ti barukong na.
Maibasar iti post-mortem examination nga inpatungpal ni Dr. Kasmere Quilates Lara-Degollado, ti Municipal Health Officer iti nadakamat nga ili, ti nakatayan ti biktima ket Acute Myocardial Infarction (heart attack) ken awan ti nakita a foul play iti pannakatay na.
