LAOAG CITY – Nakasangpeten idiay isla ti Hawaii ti bangkay ti soldado nga Ilokano a napapatay idiay Afghanistan.
Daytoy ti inbatad ni Bombo International Correspondent Manny Pascua idiay Hawaii.
Ti bangkay ni Sgt. First Class Raymond Rarugao Transfiguracion ket sinabat ti pamilya na, gagayyem na ken sabsabali pay iti Kohna International Airport idiay Big Island Hawaii.
Naggapo ti bangkay ti soldado idiay San Francisco idiay Amerika.
Kasangwanan ti panag-take off ti eroplano iti United Airlines manipud San Francisco ken agturong iti Kona International Airport idiay Big Island ket nangidiaya ti piloto ti kararag karaman kadagiti pasaheros para iti kararwa ti napapatay a suldado.
Maipalagip a natay ti ssuldado idi Agosto 7 ita a tawen kalpasan ti improvised explosive device attack bayat ti misyon na idiay Afghanistan.
Nabati ni Transfiguracion ti asawa na ken dagiti dua nga annak na.
Saan met pay nga amo no inton kaano ti pannakaitabon na.
