LAOAG CITY – Inbutaktak ni Barangay Kagawad Chito Visaya iti Barangay Pipias iti ili ti Bacarra nga adda ti nakakita a nakabkabil idi rabii ti maysa a senior citizen a nabirukan a maysan a nalamiis a bangkay itay bigat iti kanal.
Segun kenni Visaya, inbaga kenkuana a mismo ti agnagan ti James Valiente a bayat ti panagawid na idi rabii ket adda ti dua nga indibidual a mangkabkabil iti biktima a ni nabigbig a ni Mr. Agustin Subia.
Inlawlawag na nga intudo a mismo ti witness ti agnagan ti “JR” ken ti kadua na a dagitoy ti nangkabkabil kenni Subia ken maipagarop a pinang-or da daytoy ti kayo.
Naamoan a ti madakakamat a “JR” ket taga-Banna ngem naikamang iti Barangay Pipias partikular iti kabagyan met laeng ti biktima.
Kunana nga idi naamoan ni Valiente a natayen ni Subia ket dagus a napan iti nakakitaan da iti bangkay ti biktima ken inpakammo na a nakita na ti napasamak.
Inbatad pay ni Visayas a ti biktima ket adda ti sugat iti teltel na a nakita da idi naiyaon daytoy manipud iti kanal.
Mainaig iti daytoy, kunana a mabalin a napagtripan dagiti suspek ti biktima nangruna ket maipagarop a nagmalmalem dagitoy a naginom ngem inpaima dan iti PNP para iti naun-uneg nga imbestigasyon.
Kabayatanna, inpetteng ni Visaya a nasingpet ni Subia ken awan ti madi a rekord na iti barangay da.
Iti agdama, agtultuloy pay laeng ti imbestigasyon dagiti otoridad seknan iti nasao nga insidente.
