LAOAG CITY – Inpabasol ni Bangladesh Prime Minister Sheikh Hasina iti political opponents na ti nadara a tignay protesta iti pagilian da a nangitunda ti pannakapwersa na a nangipatungpal ti curfew tapno masigurado ti kinatalged ti publiko.
Inpetteng na a no isuna laeng ti masurot ket saanna a kayat ti mangipatungpal ti curfew ngem inpasigurado na nga ikkaten na daytoy apaman a sumayaat ti sitwasyon.
Inrakurak daytoy ni Hasina bayat ti pannakitaripnong na kadagiti business leaders iti ciudad ti Dhaka a kabisera ti Bangladesh.
Ti komento ni Hasina ket kalpasan nga inbasura ti kangatoan a korte ti Bangladesh ti quota iti trabaho ti gobierno a nangitunda ti sumagmamano a lawas a nadara a tignay protesta.
Umabot iti nasurok a 150 a tattao ti natay iti nadara nga engkwentro iti nagbaetan dagiti demonstrador ken pulis.
Gapu iti napasamak ket adda dagiti agpanpanawagan a bumaban iti pwesto ni Prime Minister Sheikh Hasina.
