LAOAG CITY – Impublikar ni Irene Joy Ishida, Department Head of Branch Operations ti Philippine Savings Bank, nga adda ti sangapulo (10) a bank accounts dagiti agasawa a da Vice President Sara Duterte ken ni Atty. Mans Carpio iti PS Bank.
Mainaig iti daytoy, dagiti nasao a bank accounts ket naglaon dagiti sumagmamano a million a pisos ngem iti baet ti panagsarita ni Ishida ket saanen a pinalubosan ni Trial Presiding Officer, Sen. Chiz Escudero a maipakita iti publiko ti pakabukelan a gatad ti kuarta nga adda iti nasao nga account.
Inpetteng ni Atty. Niña Aguilar, mangidadaulo iti Anti-Money Laundering Division ti Metrobank, a ti amin nga ipaspasada a ‘suspicious transactions’ iti Anti Money Laundering Council (AMLC) ket dumaldalan iti naiget a panangtingiting ken validation.
Ti nasao nga inrakurak ni Aguilar ket kalpasan ti saludsod ni Pangilinan kenkuana mainaig no kasano a maamoan dagiti nakaskasdaaw a bank transactions.
Segun ken ni Aguilar, sakbay a mai-report dagiti bank transactions kas ‘suspicious’ ket umuna daytoy a matingiting tapno saan a maapektaran ti bank profiles ti account holders.
