LAOAG CITY – Inpakaammo ni Ms. Cathy Estavillo, Secretary General ken Spokespeson iti Bantay Bigas nakaro ti nagbalin nga epekto ti pannakaikkat ti regulatory powers ti National Food Authority (NFA) iti presio ti bagas ken iti pagbiag dagiti mannalon iti pagilian.
Segun kankuana, nagpukaw ti nalaka a bagas a P27 ken P32 kada kilo para kadagiti napanglaw, idinto nga ado dagiti imported a bagas ti angangakaten ti pagilian a rason ti panagbaba ti presio ti bagas ken rimmigat ti panagbiag dagiti mannalon.
Kinunana a sakbay a naan-anay a nagbalin a linteg ti Rice Liberalization Law wenno Republic Act No. 11203- February 14, 2019 a saan a bimmaba ti presio ti panagangkat iti bagas gapu ta kontrolado daytoy dagiti monopolyong trader a panggepda a mapagtalinaed ti nangato a ganansia.
Maibasar iti datos manipud iti Philippine Statistics Authority (PSA), dimmanon iti 4.25 million metric tons ti volume ti imported rice agingga iti Nobiembre, ngem nagtalinaed iti presio a P50 ken P55 iti regular milled rice iti kada kilo manipud idi Enero.
Iti laksid ti pannakakissay ti taripa manipud 35% agingga iti 15%, kunana a dagiti laeng dadakkel a trader-importers ti nagunggonaan, idinto nga agtultuloy a maapektaran ti panagbiag dagiti mannalon.
Kabayatanna, nagpannawagan ni Estavillo iti pannaka-repeal ti Rice Liberalization Law ken pannakaisubli ti regulatory powers ti NFA.
Ginutigot ni Estavillo iti publiko a nga agkaykaysa iti pannakaipasdek ti pambansa-demokratikong industriya ti bagas ken pagay, ken magun-od ti food security ken rice self-sufficiency.
