LAOAG CITY – Immapela ni Dr. Gary Dionisio, convenor ti Bantay Senado ken Dean ti St. Benilde’s Government and Diplomacy Department nga aramiden nga al-alisto a maawatan ti maiwaywayat nga impeachment trial ni Vice President Sara Duterte.
Inawaganna a legalistic ken alienating ti maisaysayangkat a trial gapu ta mapukpukaw ti kangrunaan a gagem ti nasao a proceedings.
Inbatadna a basar iti panagsursor ti Bantay Senado kadagiti watch party ti grupoda kadagiti nagduduma a lugar iti pagilian, naobserbaranda a naruay kadagiti tattao ti marigrigatan a makaawat kadagiti termino nga us-usaren iti nasao nga impeachment trial.
Gapu iti daytoy, insingasingna iti gobierno a mangilatang ti pundo tapno maipublikar ti summary ti nasao a proceedings kadagiti nagduduma a pagsasao pakairamanan ti sign language.
Inpetteng ni Dionisio nga iti nasao a wagas ket makasurot ken maawatan ti tunggal Pilipino dagiti mapaspasamak iti impeachment trial ti Bise Presidente.
