LAOAG CITY – Maysa a kaha ti baraha ti nakagun-od ti baro a world record gapu iti kinabassitna dagitoy.
Kinumpirmaran ti records keeping organization a Guinness World Records a ni Rob Hallifax ti London ti nakaaramid ti World’s Smallest Pack of Playing Cards nga addaan ti rukud a 5 mm x 3.6 mm iti kada baraha.
Maidasig dagiti baraha iti kadakkel laeng ti bagas. Ti sukat dagitoy ket 250 a daras ti kabassit iti ordinario a playing cards.
Inbatad ni Hallifax a maysa a product designer and engineer, nagusar isuna ti professional printer tapno i-print dagitoy. Ti nagbalin a challenge kenkuana ket no kasanona a kartiben dagiti baraha isu a napanunutanna ti agusar ti laser cutter tapno agbalin nga accurate ti kada panagkartib iti daytoy.
