LAOAG CITY – Inbaga ni Police Capt. Joseph Calderon, ti chief of police iti ili ti Dingras a naiget ti panagbanbantay da iti Barangay Barong ken Barangay Espiritu a nakalockdown pay laeng agpapan ita.
Daytoy ket kalpasan nga adda ti maysa nga opisyal ti barangay Barong a nagpositibo ti covid-19 idinto nga iti Barangay Espiritu ket nagpositibo met ti maysa nga APOR.
Segun ken ni Calderon, umabot iti 10 nga opisyal ti barangay ken uppat a miembro ti pamilya ti pasyente ti primary contacts na.
Innayon na a nakaswab test aminen dagiti primary contacts ken maiyur-uray laengen ti resulta na.
Mangnamnama ni Calderon a negatibo amin ti resulta ti swab test dagiti primary contacts ti covid-19 patient iti Barangay Barong kasta met iti Barangay Espiritu iti nasao nga ili.
Kabayatanna, nagpalagip manen ni Calderon a masapol nga agsuot ti face mask ken face shield no rumuar iti pagtaengan tapno saan a basta makaptan ti makapatay a virus.
