LAOAG CITY – Kinumpirmaran ni Brgy. Chairman Jerry Alonzo iti Brgy. Cavit ditoy siudad a nakaawat ti paper bag a naglaon ti bala, kandela ken surat a mangipangpangta iti biag na.
Kuna na a naawat na daytoy idi malem ti Sabado Gloria ken mismo a ti asawa ken ipag na ti nangitedan ti maysa nga indibidual a nangiturong iti tricycle.
Inbatad na a ti inpakaammo ti nangiyawat ti paper bag ket order na daytoy ken awanen ti masapol a mabayadan.
Gapu iti daytoy, kuna ni Alonzo a nagsiddaaw idi naawat na ti paper bag gapu ta awan ti order na ken naklaat gapu kadagiti nakita na.
Inpakaammo na nga iti surat ket nailanad ti “nu nikomit mon ti bagim iti nalabbaga, saan kan nga umakar iti berde” ken maipagarup a napangtaan a matay iti panagpiyesta da kadua na ti dua a konsehal na.
Kuna ni Alonzo a dagus a nagturong iti PNP ken inpaima na dagiti naawat na.
Mainaig iti daytoy, inbatad ti kapitan nga awan ti ammo na a rason iti pannakaipangta na nangruna iti politika gapu ta amin nga agkampanya iti barangayda ket pasangbayen na.
