LAOAG CITY – Inpetteng ni Police Lt. Col. Reynante Baltazar, ti deputy provincial director for administration iti Ilocos Norte Police Provincial Office (INPPO) nga ipudno koman ni Barangay Chairman Jimmy Pablo iti Barangay Cacafean idiay ili ti Marcos ti kinatao ti nangpaltog a poon ti nakatayan ni Police Corporal Wilbert Rarogal Jr. iti Barangay Santiago ti nasao nga ili.
Maipalagip nga addan makabolan ti napalabas sipud napasamak ti pammaltog ngem agpapan ita ket nagtalinaed a nakakaem ti ngiwat ti kapitan mainaig ti kinatao ti inlubbon na a nangpaltog ken ni Rarogal.
Inpalgak ni Baltazar a nasaysayaat no agsaritan ni Pablo tapno masolbaren ti kaso ken mapagsungbat ti gunman.
Kuna na a rumuar to met laeng ti kinapudno gapu ta iti mata ti linteg ken dagiti tattao, kangrunaan na kadakuada ket ammo ti kapitan ti kinatao ti gunman, uray ipetpetteng ni Pablo a saanna nga am-ammo ti gunman.
Nagpangta ni Baltazar a no saan nga ipudno ni Pablo ti kinatao ti gunman ken nasaysayaat pay no admitiren na a daytoy ti akin-aramid ti krimen gapu ta isuna met laeng ti maimameg.
