LAOAG CITY – Naglikudan ni Barangay Chairman Macky Barbar iti Barangay 6 iti ili ti San Nicolas nga addan ti tallo a bolan ti pagperyaan iti barangay da.
Inlawlawag ni Barbar a mangrugi koma idi Mayo ti fiesta iti barangay da ngem naitantantan.
Iti baet daytoy, kuna na a nagplastar lattan dagiti pagperyaan iti barangay da ken saandan a pimmanaw uray naitantan ti panagfiesta da.
Nupay kasta, inpakaammo ni Barbar nga intono Hunyo 24 ket isu ti pannakaisayangkat ti maibilang a “Big Day” wenno awarding night iti nadakamat a barangay ken inkari na nga iti kabigatan na ket saan ton nga agoperar dagiti pagperyaan.
Immuna iti daytoy, adda ti naidanun nga impormasyon iti Bombo Radyo Laoag nga addan ti tallo a bolan nga agop-operar ti peryaan, ken maipagarop a saan laeng a gagangay a pagperyaan no di ket rumrumuar a pagsusugalan payen.
Iti panagturong ti newsteam ti Bombo Radyo Laoag iti lugar ket awan ti mangimatmaton iti pagperyaan, pinatay dagiti maseknan silaw ken nagtatalaw dagiti tattao.
