LAOAG CITY – Naglikudan ni Barangay Chairman Manny Morales iti Barangay 1 ditoy ciudad ti Laoag ti alegasyon kenkuana ni Princess Arellano a maipagarop a saanna a kayat nga ikkan ti Business Barangay Permit.
Segun ken ni Morales, amin a mapan agkiddaw ti dokumento iti barangay da ket masapol nga ikkan da, ngem iti kaso ni Arellano ket inadmitir ti kapitan nga adda ti pammilin na kadagiti kakadwa na a saanda nga ikkan ti kidkiddawen na a permit agingga a saanna a makasarita iti personal.
Segun iti kapitan, kadagiti aldaw a napan ni Arellano iti barangay hall ket awan isuna gapu iti nagduduma a nakakumikuman na iti ruwar ken adda pay aldaw a saan a simrek gapu iti panagsakitna.
Gapu iti daytoy, atapen ni Arellano nga ilemlemmengan na ken saanna a kayat nga ikkan ti barangay business permit.
Inbutaktak ni Morales a ni Arellano ket ado dagiti nakairamramanan na a reklamo no sadinno a konsehal paylaeng daytoy idi addan dagiti trinatar da maipapan iti maipagarop nga utang a kwarta ti naud-udi nga umabot iti agarop a 300 a ribo a pisos.
Malaksid iti daytoy, kuna ti kapitan nga adda pay dagiti reklamo kontra ken ni Arellano a nagpapaorder ngem saanna nga intungtungpal, inlemlemmangan na dagiti maipagarop a nakautangan na, ken dadduma pay.
Innayon na nga adda pay idi ti subpoena manipod National Bureau of Investigation a naiturong ken ni Arellano.
Inpakaammo ni Morales a dagitoy ti rason no apay a kinalikagoman na a makasarita iti personal ni Arellano sakbay nga ipaayan da koma daytoy ti kidkiddawen na Barangay Business Permit.
Nupay kasta, inpetteng ni Morales nga iti panagsasango da kada Arellano iti mismo a barangay hall ket saan a nakisarita a nasayaat ti naud-udi gapu ta nagbugkaw-bugkaw pay daytoy.
Immun-una iti daytoy, nagpangta ni Arellano nga ireklamo na ni Barangay Chairman Morales iti Department of the Interior and Local Government (DILG) ken ditoy Bombo Radyo Laoag.
