LAOAG CITY – Inbatad ni Barangay Chairman Wilfred Quidilla iti Brgy. 19 iti ili ti San Nicolas nga awan ti kinapudno na ti agwarwaras a damag nga adda ti nangregalo kenkuana ti lungon.
Nupay kasta, kinumpirmaran na nga adda ti naawat da a death threat, a pakairaman ti dadduma pay a pada na metlaeng a kapitan iti ili ti San Nicolas.
Inlawlawag ni Quidilla a saan nga isuna a mismo ti nakaawat ti death threat ngem ketdi ti maysa a kadwa da kapitan no sadinno a karaman da iti listaan.
Masdaaw ni Quidilla no apay a nairaman iti listaan dagiti maipagarop a mapangpangtaan idinto nga awan ti ammo na nga ar-aramidan na a saan a nasayaat.
Kabayatanna, nagyaman met ni Quidilla iti nailian a pulisya iti agtultuloy a panangipapaay da ti serbisyo, saan laeng a para kenkuana nu di ket karamanen dagiti kabarangayanna.
