LAOAG CITY – Inpetteng ni Barangay Chairwoman Lourdes Estreda iti Barangay Pancian iti ili ti Pagudpud nga awan ti ammo na a liway da nga opisyal seknan iti pannakaibunong iti ayuda manipud iti Social Amelioration Program (SAP).
Segun kenni Estrada, maipagarop nga inbatad ti MSWDO iti nasao nga ili nga uray dagiti SSS pensioner ket mabalin a makaawat iti SAP.
Inbatad na a saan a nailawlawag kadakuada nga opisyal a dagiti laeng kuma kwalipikado nga SSS pensioner ket dagiti marigrigat nga isu met ti makaawat ti ayuda manipud iti SAP.
Inlawlawag na a saan nga isuda nga opsiyal ti nagpili kadagiti kwalipikado no diket nagindorsar da laeng ken ti DSWD ti napan nag-validate.
Ummuna iti daytoy, kinumpirmaran ni Estrada a dagiti innem nga indibidwal nakaawat idi ti SAP ket SSS pensioner, meimbro ken nakaawat idin ti Registry System for Basic Sectors in Agriculture (RSBSA).
Nupay kasta, kunana a kalpasan a nailawlawag ken gapo iti kinaado a riri ket boluntaryo a napan insubli dagiti innem ti inawat da a kwarta tapno maited kadagiti rumbeng a benipisyaryo.
Mainaig iti daytoy, kuna ti kapitan nga ado dagiti erasures wenno napunas iti form gapo ta idi naiyawat kadakuada ti form ket inted da kadagiti ammo da a kwalipikado ngem iti panang-validate ti DSWD ket ado dagiti saan a nakapasa.
Kabayatanna, inbatad ni Estrada a nasken kuma a dagiti agrekreklamo ket napan nakisarita kenkuana ken dagiti pada na nga opisyal saan ketdi a nagpost iti social media ken iti NBI.
