LAOAG CITY – Impakaammo ni Barangay Chairwoman Marilyn Resquir iti Barangay 48-A Cabungaan ditoy ciudad ti Laoag nga adda dagiti i-im-implementar ti barangay da nga ordinansa tapno agtalinaed ti linak, urnos ken talna.
Dagitoy a pagalagadan ket pakairamanan ti pannaka-iwayat ti curfew hours iti oras ti alas diyes ti rabii agingga alas sais ti bigat, panangiparit ti ag-parking iti barangay road, pannaka-iparit ti agsugal, agpuor, aginom ti nasanger iti sangu dagiti sari-sari store ket ti “aso mo tali mo”.
Segun ken Resquir, dagiti dadduma a pagaladan ket naggapo met laeng iti lokal a gobierno iti nadakamat a ciudad.
Kunana nga adda naangay a seminar no sadinno a napagnunumuan da ti curfew hours ti panagusar ti videoke ken panagi-inom tapno madisiplinaan dagiti residente.
Binallaagan da pay dagiti agtagikua kadagiti sari-sari store a no mabalbalin ket awan ti agiinom iti sango ti tiangi da.
Innayonna nga apaman a nai-implimentar daytoy nga ordinansa ket rinabii da nga agsursor ken agmonitor para iti naan-anay a pannaka-ipatungpal ti nadakamat a pagalagadan.
Inlawlawag ni Resquir a no adda da aglabsing ket kasarita da nga umuna dagitoy ngem no maulit pay ket dita a mapatawan da ti pannusa no sadinno a masapol da ti ag-community service iti las-od ti maysa a lawas.
Nupay kasta, kunana a manipod idi nai-implimentar daytoy a pagalagadan ket awan pay ti naglabsing, pakairamanan nga awan pay ti nangsalungasing iti curfew hour a maipatpatungpal iti barangay da nga apaman nga ag-alas diyes ti rabii ket saanen a mabalin ti agwarang-warang malaksid laeng no emergency.
Malaksid iti daytoy, ket adda metten ti panagsursor da tapno mabagaan dagiti amin a bumarangay iti Barangay 48-A Cabungaan ditoy ciudad ti Laoag nga ikawar da dagiti aso da ken saan da a baybay-an nga agwarang-warang nangruna kadagiti kalsada.
Daytoy ket maitunos pay laeng ti inpaulog ti Provincial Veterinary Office ditoy probinsya nga amin nga aso ket rumbeng na laeng a maikawar tapno maliklikan ti aniaman nga insidente.
Nu pay kasta, kinumpirmaran ni Resquir nga awan met pay ti nagbalin a biktima seknan ti pannakagat ti aso iti nadakamat a barangay.
Kabayatanna, inpetteng ti Kapitana a no man saan nga umdas dagiti ballaag da kadagiti matiliwan da a nga aglabsing kadagiti linteg nga ipatpatungpal iti barangay da ket ipa-ima da dagitoy iti biang ti Philippine National police ditoy ciudad ti Laoag.
