LAOAG CITY – Nasuspenso ti innem a bulan ni Barangay Chairman Evangeline Rarangol iti Brgy. Nagpatpatan iti ili ti Solsona.
Daytoy ti kinumpirmaran Hon. Lourdines Dela Cruz, Sang. Bayan Member iti ili ti Solsona.
Segun ken Dela Cruz, Mayo 13,2024 idi naaprobaran ti panakasuspenso ti kapitana gapu kadagiti maikanniwas nga inaramidna idi simmangbay ti Bagyong Egay.
Inlawlawagna a naikkan ti gundaway dagiti akusado a mangipresentar kadagiti ebidensya da rason no apay a medyo nabayag ti imbestigasyon.
Mainaig iti daytoy ket inpakaammo ni Dela Cruz a dua nga administrative case ti naipila kontra ken Rarangol; Grave misconduct ken conduct prejudicial to the best of service.
Naipila ken Rarangol daytoy gapu ta adda ti maysa a barangay official a nangpaneknek nga agpaypayso a dagiti 100 DSWD food pack a maipaay kuma kadagiti 100 ket nagudwa ken naipaay iti 200 a pamilya.
Kunana a no saan limitaran ti linteg a suspenso laeng ti penalty ni Rarangol ket mabalin pay a removal.
Inlawlawag ti Sang. Panlungsod member a ti suspenso a naipataw ken Rarangol idi napan a bulan ti Enero ket preventive suspension laeng ken saan a makuna a penalty a kas iti naipataw ita.
Kabayatanna, ti agserbi nga acting Barangay Chairman iti nasao a barangay ket ni Sangguniang Barangay Member Reygan Abes.
