LAOAG CITY – Naglikudan ni Barangay Chairwoman Rhodalyn dela Cruz iti Barangay Lagui-Sail ditoy ciudad ti Laoag ti alegasyon a pagbalbalinen nan a balay ti barangay hall gapu ta maipagarop a kanayun nga isu ti pagturugan na.
Inlawlawag ni dela Cruz a no adda man dagiti gundaway
a makita dagitoy kadwa na dagiti dadduma nga opisyal ti barangay ket adda dagiti kasapulan nga ileppas da a trabaho.
Kuna ni dela Cruz nga ado ti trabaho da iti barangay hall isut gapuna nga adda dagiti gundaway nga ag-overtime da tapno maileppas dagitoy.
Inpetteng ni dela Cruz nga ammo na ti linteg a mabalin na ti maturog iti barangay hall gapu ta ti panagserbi na kas ina ti barangay ket 24/7.
Kabayatanna, inpeksa ni Barangay Chairwoman dela Cruz ti sakit ti nakem na iti maysa nga estasyon ti radyo gapu ta inpagarop na a mainterview laeng ken saanna a ninamnama a naka-live daytoyen.
Malaksid iti daytoy, maluksaw pay ti kapitana iti panangibid-video a nakalive ti reporter ti bangir nga estasyon ti personal service na nga NMAX gapu ta kukua daytoy ti manugang na.
Mainaig iti daytoy, inkalintegan ni Barangay Treasurer Rowena Bumanglag a kasapulan nga agovertime na gapu ta saan pay a nalpas ti annual budget da no sadinno a naiturn-over laeng kenkuana iti kallabes.
Inpalgak na a saan a kayat a panawan ida ti kapitan iti barangay hall isut gapuna nga iyur-uray na dagitoy a malpas ken agkukuyog dan nga agawid.
Uray ni Sang Kabataang (SK) Chairman Vince Kenette Cariño ket pinasingkedan na a saan da nga um-umyan gapu ta no makaturugen dagitoy ket agkukuyog da a rumuar iti barangay hall tapno mapan da maturog iti bukod da a balay.
Inkalinetgan na a saan da a masango ti agtrabaho iti barangay hall iti bigat gapu ta adda ti serrek da iti pagadalan isut gapuna a kapilitan nga iti rabii da nga aramiden dagiti trabaho da kas opisyal iti barangay.
