Inpakaammo ni Brgy. Kagawad Jhun Villoria iti Barangay Duripes iti ili ti Bacarra a naipan iti lockdown ti barangayda.
Daytoy ket kalpasan a a nakumpirmaran a ti INC-5 wenno maikalima a kaso ti covid-19 ditoy probinsya ket naggapo iti nasao a barangay.
Segun ken ni Villoria, napagnunumoanda nga opisyal a saan a pulos a mapalubusan a sumrek iti barangayda dagiti aggapo iti sabali a lugar.
Kuna na a dagiti laeng nurse wenno medical workers, gumatang iti agas ken adda iti emergency a lakad na kas kadagiti mapan agpacheck-up ti mapalubusan a rumuar.
Inbatad na a dagiti mapan agtrabaho kadagiti establisyimento ken agturong iti taltalon ket temporaryo a saan a mapalubusan a rumuar.
Maianaig iti daytoy, inpakaamo ni Villoria nga adda iti stable a kundisyon ni INC-5 idinto a negatibo ti nagbalin a resulta ti swab test ti ina na ken ti kaipasngay nga anakna.
Kabayatanna, kuna na a basar iti pammilin ni Mayor Fritzie Dela Cruz-Gapasin iti nasao nga ili ket agbayag ti lockdown iti nasao a barangay agingga iti Hulyo 5.
