LAOAG CITY – Naipagunamgunam kadagiti kameng ti ABC Federation wenno Liga ng mga Barangay ti Ilocos Norte a mapagbalin nga aktibo dagiti Barangay Fire Brigade.
Segun ken ni ABC Federated Pres. Ryan John Pascua, daytoy ti maysa kadagiti kalikagum ni Gob. Matthew Marcos Manotoc.
Inbatadna nga adda met ketdin dagiti nabuangay a Barangay Fire Brigade kadagiti amin a barangay ditoy probinsia ken ti laengen problema ket ti pannakaipatungpalna.
Inlawlawagna a masansan a madamdamag kenkuana kadagiti at-atendaranna a Barangay Newly Elected Officials Training ti pangalaan dagiti barangay ti maipaay nga insentibo kadagiti kameng ti Barangay Fire Brigade.
Kunana nga ilunglungalongna kadagiti barangay officials ti panangilatangda ti pundo a maipaay nga insentibo tapno naregregget ken nagaggaget pay dagitoy a mangipatungpal iti pagrebbenganda kas kameng ti fire brigade.
Malaksid iti daytoy, kuna ni Pascua a planoda ti mangaramid ti “request letter” a maiturong ken ni Gob. Manotoc tapno agkiddawda ti nayon a pundo a maipaay nga insentibo kadagiti kameng ti nasao a grupo.
Inpettengna a ti maysa a barangay fire brigade ket buklen ti sangapulo ket dua agingga iti sangapulo ket lima a miembro a pakairamanan dagiti barangay tanod.
Nupay kasta, inannugotna a nasaysayaat ken napinpintas pay no ad-adu dagiti maallukoy nga agbalin a kameng ti nasao a grupo.
Kabayatanna, inpakaammo ni Pascua a karaman pay kadagiti ilawlawagna iti Barangay Newly Elected Officials training ti kinapateg ti pannakaipatungpal ti Solid waste management ken ti panangkiddaw nga ad-adda pay nga igetan dagiti adda quarry site iti masakupanda a barangay ti panangkitada a naimbag kadagitoy.
