LAOAG CITY – Inlawlawag ni Atty. Gerald Gallardo iti Local Government Officer II iti Department of the Interior and Local Government (DILG) a saan a mabalin a mausar para iti personal ti barangay hall.
Segun ken ni Gallardo, ti Barangay Hall ket kukua ti gobierno ken naipatakder daytoy para iti pannakaipaay ti serbisyo kadagiti residente.
Kunana nga adda met ti naituding nga office hours nga alas otso ti bigat agingga alas singko ti malem, malaksid no adda ti exemption na ket mabalin a 24 oras nga agoperar ti barangay hall.
Inbatad ni Gallardo a nawaya dagiti residente a mangipila ti kaso adda laketdi ebidensya da ngem karbengan met ti kapitana a mangdepensa ti bagi na.
Kuna na nga adda metten ti inpatulod da a surat ken Barangay Chairwoman Rhodalyn dela Cruz iti Barangay Lagui-Sail ditoy ciudad ti Laoag mainaig iti alegasyon a pagbalbalinen nan a balay ti barangay hall gapu ta maipagarop a kanayun nga isu ti pagturugan na, ken iyuray da laeng ti sungbat na.
Innayon na a no mapaneknekan nga agpaypayso dagiti alegasyon iti nadakamat a kapitan ket mangiyuswat da ti aksyon kageddan ti panangipetteng ni Gallardo a saan da a palubosan daytoy gapu ta masapol nga agbalin a role model ti mangidaulo ti barangay iti kadagiti masakupan na.
