LAOAG CITY – Sumango ti agsusukot a kaso ni Barangay Kagawad Macky Tamayo Martin iti Brgy. 2 ditoy siudad ti Laoag.
Daytoy ti kinumpirmaran ni Police Lt. Col. Amador Quiocho, hepe ti PNP Laoag.
Kuna na a ti naipila a kaso ket damage to property, alarm and scandal ken iligal a panagikot ti paltog gapu ta awan ti lisensya ti paltog nga insuko na.
Segun kenni Quiocho, possible nga agpyansa ni Martin para ti temporaryo a pannakawaya-waya na.
Inbatad na nga awan pay ti resulta dagiti naiwayat nga eksaminasyon ken uray negatibo dagitoy ket saan a kayat a sawen a saan a nagpaputok daytoy.
Maipalagip a nagpalawag ni Martin iti PNP a naaramid na ti nagpaputok ti paltog gapu iti sakit ti nakem na iti ipupusay ti ama na a ni dati a Konsehal Roly Martin itay napan a bolan.
Innayon ni Quiocho a possible a nabartek ti suspek gapu ta naipagagangayen a no adda ti pasken kas ti panangsarabo ti baro a tawen ket saan a mapukaw ti arak.
