LAOAG CITY – Kinumpirmaran ni Barangay Chairman Ruben Sampayan iti Barangay Araniw ditoy ciudad ti Laoag a barangay kagawad da ti pimmusay a nagpositibo ti covid-19.
Daytoy ket ni IN-C1361, babai, agtawen ti 71 ken residente iti nasao a barangay.
Inbaga ni Sampayan a nai-cremate a dagus ti bangkay ti pimmusay a kagawad da idiay ciudad ti Vigan ken addan iti balay da ti dapo na.
Nupay kasta, kuna na a saan da pay a nakapan iti balay ti nasao a kagawad ta iyur-uray da ti pammalubos ti City Health Office gapu ta naka-quarantine pay laeng iti agdama ti pamilya ti pimmusay uray nagnegatibo da iti swab test.
Innayon na a kalikagom da met nga ipaayan ti pammadayaw ti nasao a kagawad gapu ta nabayag a nagserserbi iti barangay da.
Kabayatanna, inbaga ti kapitan a ti pimmusay a kagawad ket adda met ti ang-angalen na idi a sakit kas ti, gastroenteritis, nangato ti blood sugar na, ken adda bassit ti ibbalna.
